АН-ын дэд дарга асан Б.Дэлгэрмаа “Та бидний эвсэл”-ээс нэр дэвшихээр болжээ

Б.Ариунзаяа
2020/05/21

Монгол Улсаас Оросын Холбооны Улсад суугаа Онц бөгөөд Бүрэн эрхт Элчин сайдаар ажиллаж байсан Б.Дэлгэрмаа жилийн өмнө “Улс төрийн албан хаагчаас бусад төрийн албан хаагч төрийн албан тушаал эрхлэх хугацаандаа улс төрийн аливаа нам, эвсэл, хөдөлгөөний үйл ажиллагаанд ямар нэг хэлбэрээр оролцохгүй байх үүрэг хүлээнэ, хуулиар зөвшөөрснөөс бусад тохиолдолд аливаа хэлбэрээр оролцохыг хориглоно” гэж заасан Төрийн албаны тухай хуулийн 37 дугаар зүйлийн 37.1.4, 39 дүгээр зүйлийн 39.1.5 дахь заалтыг тус тус зөрчиж, улс төрийн намын үйл ажиллагаанд оролцон, Ардчилсан намын дэд даргаар сонгогдож байв.

Улмаар Монгол Улсаас Оросын Холбооны Улсад суугаа Онц бөгөөд Бүрэн эрхт Элчин сайдын албан тушаалаасаа эгүүлэн татагдсан.

Улстөрд эргэлт буцалтгүй орсон түүнийг өнгөрсөн хугацаанд АН-аас нэр дэвшинэ хэмээн таамаглаж байсан ч талаар болж, бие даагчаар бүртгүүлж, мөрийн хөтөлбөрөө аудитаар хянуулсан. Гэвч Б.Дэлгэрмаа улстөрийн нүүдлээ дахиад л өөрчилжээ. 

Энэ удаагийн сонгуульд МАХН, МУНН, ИЗНН-ын хамтран байгуулсан “Та бидний эвсэл”-ээс нэр дэвшихээр болжээ. Тэрбээр Иргэний Зориг Ногоон намд элсэн улмаар эвслийн нэрээр 2020 оны сонгуульд Сүхбаатар дүүрэгт нэр дэвшихээр болсон байна.