Т
О
В
Ч

Онцлох
Сэдэв
tovch.mn
товч мэдээлнэ

Хөвсгөл аймгаас 700 - 800 жилийн өмнө хадгалагдсан гурван ваар өрөм, шар тос олджээ

2019 оны 08 сарын 15

Монголын Үндэсний музей, АНУ-ын Питсбургийн их сургууль, Америкийн Монгол Судлалын төвтэй хамтран Дархадын хотгорын сав нутагт археологийн судалгааны "Умард Монгол" төслийг хамтран хэрэгжүүлдэг. Төслийн багийн эрдэмтдийн энэ зуны малтлагын үр дүнд дэлхийн археологийн шинжлэх ухаанд нээлт болохуйц, Монголын эзэнт гүрний язгууртнуудад холбогдох цоо шинэ олдворуудыг нээжээ.Уг судалгааны баг 2018, 2019 онд Хөвсгөл аймгийн Улаан-Уул сумын Мунгараг багийн нутаг "Хориг" хэмээх газарт тонож сүйтгэгдсэн Монголын эзэнт гүрний үед холбогдох бүлэг булшийг авран хамгаалах, үлдэж хоцорсон эд өлгийн зүйлсийг цуглуулах ажлыг хийлээ. Эдгээр тоногдсон булшны шороо, ухсан нүхийг нягтлан шалгах явцад Эзэнт гүрний үед холбогдох судалгаа болон үзмэрийн маш өндөр ач холбогдолтой олон тооны олдворууд илэрлээ.

 

Эдгээрийн дотор 700 - 800 жилийн тэртээ мөнх цэвдэгт тэс хөлдүү хадгалагдсан гурван ваар дүүрэн өрөм, нэг ваар дүүрэн шар тос нь Монголын төдийгүй дэлхийн археологийн судалгаанд нэн ховор нээлт болж буй олдворууд юм.





Түүнчлэн алт, мөнгө, торго, төмөр, яс, шир, үйсээр хийсэн олдворууд болон хүн, малын яс зэрэг Монголын эзэнт гүрний үед холбогдох олон тооны маш чухал хэрэглэгдэхүүнийг авран хамгаалж, цуглуулаад байна. Ялангуяа, алтан нар, сарны дүрс, мөнгөн сарны дүрс, бурхны дүрстэй нимгэн алтан эдлэл, алтан ээмэгнүүд, бүсний алтан чимэглэл, дотроо торгонд баринтаглаж боосон эд зүйл агуулсан ширэн хавтага, алтан утастай, хас, луу болон домгийн амьтдын дүрс хээтэй олон төрлийн торгон дээл хувцасны хэсгүүд, ширэн гутлын хэсгүүд, нум, сумны зэв, саадаг, хоромсого, шаазан болон шавар ваарнууд, ясан сойз, адуу малын тоног хэрэгсэл гэх мэт хэдэн зуун олдворууд бий.

 

Тус судалгааны багийг Монголын талаас Монголын Үндэсний Музейн Эрдэм шинжилгээний төвийн дарга, доктор Ж.Баярсайхан, АНУ-ын талаас доктор Жулиа Кларк нар удирдан ажиллаж байна. Бидний авран хамгаалж, цуглуулсан энэхүү өв соёлын олдворууд нь Монголын эзэнт гүрний ялгуусан их түүхийн гэрч болон эдүгээ болоод ирээдүй хойч үеийнхний гэгээн мэлмий, гэрэлт ойг мөнхөд мялааж, үндэсний бахархал, өв соёлоо дээдлэх үзэл төлөвшүүлэхэд чухал үүрэг гүйцэтгэнэ гэдэгт итгэл дүүрэн байна гэж Монголын Үндэсний музейгээс мэдээллээ.

 

Сэтгэгдэл бичих

Сэтгэгдэл

  • хулгайч авах дөхждээ

  • Маш том загвар сайтай чамин барилгатай музейнүүдийг хотоос гадагш гаргаж бариад энэ мэт ховор үзмэрүүдээ цэгцтэй үзэмжтэй байршуулан хот музей хооронд цэлгэр өргөн замаар холбовол олон жуулчин ирэх байхдаа монголчууд бид ч гэсэн амралтийн өдрөөрөө тохитой авчтобусаар цагийн хуваарийн дагуу очиж үзмээр байна даа Багш нар гэсэн сурагчдаа очиж үзнэ дээ Ийм болчихвол ой мод байгальд аялж түймэр тавих нь багасна биз дээ Багачууд сурагчдад үзүүлэх харуулах юм олдохгүй юм даа

  • Муусөйн хүүр тоногчид хамаг өрмийг нь авсанда гэмэн ч бас ховор зүйлүүд үлдэж ирсэнд та бүхэнд талархаж монголчууд ямар их өв соел аины хишигтэйг харуулсан хосгүй олдвор болжээ

  • сонирхолтой