“Буянт-Ухаа 2”-т орон сууцтай болох боломж 60-д нэг
“Буянт-Ухаа 2” хорооллын 972 айлын орон сууцаас түрээслэх хүсэлтэй нийт 35 058 иргэн цахимаар бүртгүүлсэн. Сонгон шалгаруулалтын комиссынхон эхний шатанд тэнцсэн иргэдийг энэ сарын 14-нд шалгаруулж, нэрсийг сайтдаа байршуулаад буй. Гэвч зарим иргэд “Шалгаруулалт шударга бус болсон” гэсэн учир нийслэлийн Орон сууцны корпорацын дэд захирал С.Дорждэрэм тайлбар өгчээ. Тэрбээр “972 айлын орон сууцны 60 хувь буюу 582 орон сууцыг л түрээслэх юм. Үлдсэнийг нь газраа чөлөөлсөн иргэдэд олгохоор төлөвлөсөн. Тэгэхээр 35 058 иргэн 582 айлын орон сууцаас түрээслэхээр бүртгүүлсэн гэсэн үг. Өөрөөр хэлбэл, сонгогдох магадлал 60-д нэг гэсэн үг. 24 иргэний мэдээлэл давхацсан. Нэг хүнийх найман удаа бүртгэгдсэн байна. Бид үүнийг мэдсэн ч иргэдэд нөхцөл байдлыг ил тод харуулахын тулд давхацсан чигээр нь мэдээлсэн. Учир нь давхацсан мэдээлэл бүрийг цахим хуудас автоматаар дугаарладаг. Тэгэхээр “Нийт төчнөөн иргэн бүртгүүлсэн байна” гээд гараад ирнэ. Тэндээс бид давхацсан иргэдийн мэдээллийг хасчихвал зарим нэг нь “Өөрсдийнхөө хүмүүсийн мэдээллийг сугалаад үлдээчихлээ, эсвэл тэнцсэн иргэдийг хасчихлаа” гэж хардаж, сэрдэхээс сэргийлсэн юм. Зарим иргэний мэдээлэл яагаад давхацсаныг одоогоор тогтоогоогүй байна. Сүлжээний алдаа байж магадгүй” гэсэн байна.
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна