Д.Дамба-Очир: Оюутолгой ХХК-д өгсөн 43 материал нууцлалтай материал биш

Админ
Өчигдөр 12 цаг 10 минут

УИХ-ын гишүүн Д.Тэрбишдагваар ахлуулсан УИХ-ын ажлын хэсэг Оюутолгойн гэрээний хэрэгжилтийг УИХ-ын ажлын хэсэг жил гаруй шалгаад өнгөрсөн онд дүгнэлтээ гаргасан. Улсын нууцын тамгатай дүгнэлтээ гишүүдэд тарааж, УИХ-аар хэлэлцүүлэхээр бэлтгэж байв. Гэтэл тэрхүү дүгнэлттэй нь гишүүд танилцаж амжаагүй байтал “Оюутолгой” ХХК-иас  УИХ-д тайлбар ирүүллээ. Хамгийн гол нь УИХ-ын ажлын хэсгийн дүгнэлт нууцын зэрэглэлтэй байсан. Мөн ажлын хэсэгт орж ажилласан мэргэжилтнүүдээс нууцын баталгаа хүртэл авсан байдаг. Хэргийн эзнээр УИХ-ын гишүүн ЭЗБХ-ны дарга Д.Дамба-Очир тодроод буй. Энэ талаар тэрбээр УИХ-ын чуулган дээр “Мягмар гаригт  Эдийн засгийн байнгын хорооны хуралдаанаар Оюутолгойн гэрээг шалгасан ажлын хэсгийн дүгнэлтийн хэлэлцэхээр бүх материалыг байнгын хорооны гишүүдэд тараасан.

Бэлтгэл ажил хангагдсан. АТГ-ын материалаас бусад  материалыг үндсэндээ байнгын хорооны гишүүдэд хүргүүлсэн. Нууцлалын чанартай хоёр материалыг мөн байнгын хорооны гишүүдэд хүргүүлсэн. “Оюутолгой” ХХК албан ёсны хүсэлт тавьсны дагуу  43 хуудас материал Оюутолгой ХХК-д өгсөн. Энэ дагуу тайлбар ирүүлсэн. Үүнийг мөн гишүүдэд тарааж байгаа. Оюутолгой ХХК-д өгсөн 43 материал нууцлалтай материал биш, УИХ-аас байгуулсан ажлын хэсгийн дүгнэлт байсан. Үүнд намайг буруутгаж хулгайгаар Оюутолгой ХХК-д аваачаад өгчихсөн зүйл байхгүй. Эдийн засгийн байнгын хороо хуулийн дагуу бэлтгэл ажил болон холбогдох материалуудыг байнгын хорооны гишүүдэд тараасан. Ирэх долоо хоногт хэлэлцэхэд ямар ч асуудал байхгүй. УИХ-аар ч  хэлэлцүүлэх боломжтой. Хариуцлагатай мэдэгдэл хийхгүй бол буруу зөрүү мэдээлэл их гарч байна” гэв.