Хорт хавдрын улмаас шаналж буй 8 настай хүү Анандад монголчууд сайхан сэтгэлээ харамгүй хайрласаар байна. Найман настай үетэнгийнхнээс нь эхлээд наян настай буурал хүртэл тэтгэврээсээ илүүчилж, Засгийн газраас олгож буй 50 мянган төгрөгөө хандивлаж байгаагаа нүүр номоороо дамжуулан мэдэгджээ.

Хандив өргөж байгаа хүмүүсийн дотор залуучууд цөөнгүй байгаагийн нэг нь Д.Номинчимэг. БНСУ-д суралцдаг оюутан тэрбээр алс орныг зорихоосоо өмнө нуруу болон хөлөө хүндээр гэмтээж, хоёр сар гаруйн хугацаанд асаргаанд байжээ.


Ананд хүүгийн амсаж буй зовлонг биеэрээ туулж, алхаж, гүйж, хүссэнээрээ хөдлөхийг ямар их хүсэж байснаа санаад хүүд эрүүл саруул ирээдүй бэлэглэхийн тулд өөрийн хайртай мотоциклоо зарж, хандив өргөхөөр шийдсэн байна.

Тэрбээр энэ талаараа “ Амьдрал баялаг. Би сургуулиа төгсөөд хүссэн ажилдаа ороод дахиад дуртай мотоциклоо авч болно. Надад цаг хугацаа, залуу нас байна. Харин Ананд дүүд минь цаг, минут, секунт бүр үнэ цэнэтэй. Аль болох эмчилгээгээ хурдан хийлгэж, эдгэрэх нь чухал. Монголоос ирэхээсээ өмнө мотоциклоо зарах гээд яг хүн нь ирээд авах үед дууг нь сонсоод л уйлчихсан. Зарж чадаагүй. Харин одоо Ананд дүүдээ амьдрал бэлэглэхэд, жаахан ч гэсэн хувь нэмэр болох үүднээс зарж байгаадаа баяртай байна” хэмээн хуучиллаа.  


Түүний гаргасан шийдвэрийг “Хүннү” клубынхан нь ч дэмжжээ. Улмаар мотоциклыг дуудлага худалдаанд оруулахаар болсон байна. Д.Номинчимэг мотоциклээ анх 6,3 сая төгрөгөөр авч байжээ.