Коронавирусний тохиолдлын тоо сүүлийн өдрүүдэд нэмэгдсээр байгаа. Өнөөдөр гэхэд л 7133 хүнд шинжилгээ хийхэд 1143 хүнээс халдвар илэрч, гурван хүн нас барсан талаар ЭМЯ-наас мэдээлсэн. Халдварын тохиолдол ийнхүү нэмэгдсэнтэй холбогдуулан холбогдох байгууллагуудаас Ерөнхийлөгчийн сонгуулийн дараа хөл хорио тогтоох санал гаргасан талаар зарим хэвлэл мэдээллийн байгууллага мэдээлсэн. 

Монгол Улсын Ерөнхий сайд Л.Оюун-Эрдэнэ өнөөдөр УОК-ын Шуурхай штабд ажиллах үеэр хэсэгчилж, хязгаарлалт тогтоож болзошгүй гэдгийг мэдэгдлээ.

Тэрбээр “Засгийн газраас дөрөв, тавдугаар сард вакцинжуулалтыг эрчимжүүлсний хүрээнд өнөөдрийн байдлаар улсын хэмжээнд вакцины нэгдүгээр тунд 90 гаруй хувь нь хамрагдсан байна. Орон нутагт дархлаажуулалтаар Өмнөговь, Дорноговь, Сүхбаатар аймаг тэргүүлж байна. Харин Увс, Дундговь, Өвөрхангай аймагт үр дүн муутай байна. 

Нийслэлд дархлаажуулалт ийм өндөр үр дүн хүрчихээд байхад аймгууд хойрго хандаж байгаад хариуцлага тооцож ажиллах шаардлага үүснэ.

Хатуу хөл хорио тогтоох нь эдийн засагт асар их хохиролтой. Иймд хатуу хөл хорио тогтоохгүй. Харин шаардлага гарвал хэсэгчилсэн хөл хорио тогтоохоос өөр гарцгүй. Тиймээс нийт иргэдэдээ анхааруулж хэлэхэд вакциндаа хугацаандаа хамрагдах шаардлагатай байна. Халдвар хамгааллын дэглэмээ сайтар барьмаар байна. Тайвширч огт болохгүй гэдгийг батлагдсан тохиолдлын тоо нэмэгдсээр байна. тэр дундаа вакцинд хамрагдаагүй хүүхдүүд ихээр өртөж байна” гэлээ.