Монгол Улсын Ерөнхий сайд Л.Оюун-Эрдэнэ Орхон аймагт ажиллалаа. Ерөнхий сайдын энэ удаагийн албан  томилолтын ажлын хэсэгт Сангийн яамны сайд Б.Жавхлан, УУХҮЯ-ны сайд Г.Ёндон, ЭМЯ-ны сайд С.Энхболд,  ЗГХЭГ-ын дэд дарга У.Бямбасүрэн болон бусад албаны хүмүүс багтсан байна.

      Тэрээр эхлээд Орхон аймгийн мэдээлэл шуурхай удирдлагын төвөөр зочиллоо.
Энэ үеэр аймгийн Засаг дарга С.Батжаргал 2021-2024 онд орон нутагтаа хэрэгжүүлэх томоохон төслүүдээ танилцуулав. Тухайлбал, иргэдийг орон сууцжуулах төсөл, короновирусний цар тахалтай холбоотой гарсан зарим нэг зардлыг шийдвэрлүүлэх, цэцэрлэгийн багшийг 2 ээлжинд шилжүүлэн ажиллах саналыг танилцууллаа.
      Монгол Улсын Ерөнхий сайд Л.Оюун-Эрдэнэ Орхон аймагт ажиллах үеэрээ дараах асуудлуудыг шийдвэрлэв.
 
1. Орхон аймагт гэр хорооллыг орон сууцжуулах зорилгоор 1000 айлын орон сууц барихаар төлөвлөж байгаа бөгөөд ИШС болон бусад асуудлыг шийдвэрлэх  50 тэрбум төгрөгийн санхүүжилтийг Засгийн газраас олгох.
2. Орхон аймаг цар тахлын эсрэг хариу арга хэмжээнд зарцуулсан 3 орчим тэрбум төгрөгийн өр үүсээд байгаа бөгөөд энэхүү 3 тэрбум төгрөгийн санхүүжилтийг шадар сайдтай  ярилцаж ирэх 7 хоногт шийдвэрлэхээр боллоо.
3. Цэцэрлэгийн багш нарыг хоёр ээлжээр ажиллуулах саналыг дэмжив. Орхон аймгийн хэмжээнд нийт 278 цэцэрлэгийн багш ажилладаг. Цэцэрлэгийн багш нарыг 2 ээлжинд оруулан ажиллуулснаар анги дүүргэлт ихтэй, ачаалал өндөртэй ажилладаг багш нарын ажлын ачааллыг багасгах зорилготой юм. Нэг багшийн дундаж цалин 800,000 бөгөөд 2021 оны 9-12 сарын санхүүжилт болох 889,0 сая төгрөгийг Засгийн газар шийдвэрлэж өгөхөөр боллоо. Ирэх жилээс Боловсролын сайдын багцад шаардлагатай санхүүжилтийг тогтмол суулгаж байхаар боллоо.
4. Гэр хорооллын айл өрхүүдэд цэвэр усны инженерийн шугам сүлжээг хүргэхэд шаардлагатай 80 тэрбум төгрөгийг шат дараатайгаар шийдвэрлэхээр боллоо.
 
Дараа нь МУ-ын Ерөнхий сайд Л.Оюун-Эрдэнэ “Эрдэнэт үйлдвэр” ТӨҮГ-ийн үйл ажиллагаатай танилцсан бөгөөд энэ үеэрээ Орхон аймгийн Баян-Өндөр сумын нутагт уул уурхай-металлурги-химийн үйлдвэрийн цогцолбор байгуулах Засгийн газрын тогтоол, Үйлдвэрлэл, технологийн паркийн үйл ажиллагаа эрхлэх тусгай зөвшөөрлийг “Эрдэнэт үйлдвэр” ТӨҮГ-ын Ерөнхий захирал Х.Бадамсүрэнд гардууллаа.
            Үйлдвэр технологийн паркийг байгуулахад нийт 1,8 их наяд төгрөгийн хөрөнгө оруулалт шаардлагатай бөгөөд өнөөгийн байдлаар “Зэсийн баяжмал хайлуулах, боловсруулах” үйлдвэрийн зураг төсөл, ТЭЗҮ-ийг боловсруулж, УУХҮЯ-нд хүргүүлээд байна.