Бенну астероидын дээжийг авчирлаа
ВАШИНГТОН. /ВВС/. Нарны аймгийн Бенну астероидын гадаргуугийн дээжийг тээсэн буугч капсул АНУ-ын Юта муж улсын нутагт ням гарагт орон нутгийн цагаар 10:42 цагт газарджээ.
Уг дээжийг NASA-гийн “Osiris-Rex” сансрын хөлөг 2020 онд Беннугийн гадаргуугаас авсан байна.
Энэ дээж бол ойрын 300 жилийн хугацаанд манай гарагтай мөргөлдөх магадлалтай Беннугийн талаар илүү их мэдээлэл өгөх ач холбогдолтой. Мөн 4.6 тэрбум жилийн өмнө үүссэн Нарны аймгийн талаар, дэлхий дээр амьдрал хэрхэн үүссэн талаар шинэ ойлголт мэдээллийг өгнө хэмээн эрдэмтэд найдаж байна.
Уг дээжийг даваа гарагт буюу өнөөдөр Техас мужийн Жонсон дахь сансар судлалын тусгай байгууламж руу илгээж, нарийвчилсан шинжилгээ хийнэ.
Их Британийн байгалийн түүхийн музейн эрдэмтэн Эшли Кинг анхдагч үнэлгээг хийх зургаан хүний бүрэлдэхүүнтэй багт оржээ.
Тэрбээр ярихдаа "Нарны аймагт үүссэн хамгийн анхны хатуу материалыг бид судална. Энэ дээжийн бүтцэд устай, шаварлаг силикат эрдсүүд байх болов уу. Найрлагадаа маш их хэмжээний нүүрстөрөгчтэй, карбонатын эрдсүүд ба кальци-хөнгөн цагааны эрдсүүд агуулсан байх болов уу" гэлээ.
Аравдугаар сарын 11-нд NASA уг дээжийн судалгааны эхний дүгнэлтийн талаар хэвлэлийн бага хурал хийхээр төлөвлөж байна. Харин өргөн хүрээтэй нарийвчилсан судалгааг хоёр жилийн дотор багтаан дуусгах ажээ.
Эх сурвалж: https://montsame.mn/mn/read/32...
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна