Монголдоо гар утас үйлдвэрлэж байна, монголчууд дэлхийн технологийн хөгжилтэй хөл нийлүүлж, иргэдийнхээ хэрэгцээнд бүрэн нийцсэн гар утсыг үйлдвэрлэнэ гэх чихэнд чимэгтэй мэдээлэл сүүлийн саруудад цахим ертөнцөөр нэлээд явсан. Учир нь манай дотоодын аж ахуй нэгжүүд өрсөлдөөн өндөр технологийн салбарт хүч үзэж, өөрсдийн нэрийн бүтээгдэхүүн гаргана гэдэг тухайн компанийн төдийгүй улсын технологийн салбарт ч томоохон дэвшил болдог.

Манай улсын хувьд “Эхлэл брэнд” энэ салбартаа танигдсан. Чихэвчнээс эхлээд USB кабель, Adapter, Powerbank зэрэг нь аль хэдийнэ өөрсдийн хэрэглэгчтэй болж, гадны бүтээгдэхүүнүүдтэй өрсөлдөх болсон. Тэдний дараагийн бүтээгдэхүүн нь HULAN21 Plus гэх гар утас. 

Гэвч тус брэндийнхэн гаалийн мэдүүлгийн улмаас их хэмжээний торгууль, татвар төлөх болсон нь олны анхаарлыг татаж, HULAN21 Plus гэх утас нь монгол утас мөн, биш гэх талцлыг үүсгээд байна. Үнэндээ дэлхийн дээр үйлдвэрлэгддэг ихэнх гар утас БНХАУ-аас гаралтай. Алдарт Iphone, Samsung хүртэл энэ улсад түүхий эдээ үйлдвэрлэж, өөрийн орондоо угсардаг. “Эхлэл” ч тэр жишгээр HULAN21 Plus гар утасныхаа ихэнх хэсгийг гаднаас авсан бөгөөд  тус брэндийг үүсгэн байгуулагч С.Батзаяа хэрэглэгчидээ бухимдуулсандаа цахим хуудсаараа дамжуулан уучлалт гуйсан байна. 

Үйл явдалтай зэрэгцээд "Эхлэл брэнд" албан ёсны цахим хуудсаараа дамжуулан HULAN21 Plus гар утасныхаа юуг нь Монголдоо үйлдвэрлэсэн талаар тайлбар хийжээ.

Тайлбарт:

Монголд юуг нь хийсэн юм бэ? гээд байх юм. За та яг иж бүрэн HULAN21 Plus харж байна.  Бид нар 

 1. Хамгийн баруун талд байгаа USB кабелийг хийсэн.

 2. Утас асахаас авахуулаад унтрах хүртэл 40000 мөр бүхий SDK программын хөрвүүлэлтийг хийсэн

 3. Программын дотоод оюуны өмчийн бүх контентийг хийсэн

 4. Google GMS Android үйлдлийн системийн албан ёсны эрхийг авж чадсан /Энэ хамгийн чухал шүү/ 

 5. Чихэвчийг хийсэн 

 6. Хайрцаг сав баглаа боодлыг Монголд хийсэн.

 Бүх гарын авлага материалыг Монголд хийсэн болно.

Бусад зүйлс бол мэдээж гаднаас авсан.