Энэтхэгийн Ченнай хотноо дэлхийн шатрын 44 дүгээр олимпиад өчигдөр өндөрлөсөн. Тус олимпиадын эмэгтэйчүүдийн ангиллын 4 дүгээр ширээнд Монголын шигшээ багийг төлөөлөн оролцсон Орхон аймгийн харьяат, Дэлхийн шатрын холбооны дэд мастер Бат-Эрдэнийн Мөнгөнзул АЛТАН медаль хүртэж Монгол түмнээ баярлууллаа.

Дэлхийн шатрын холбооны дэд мастер Б.Мөнгөнзул 10 өрөг тоглохдоо 8 хожиж,1 тэнцэн,1 хожигдож 85%-н хожил авч ширээндээ түрүүлсэн байна. Мөн тэрбээр энэхүү амжилтаараа Дэлхийн шатрын холбооны мастер цолны болзол хангаж цолоо ахиулжээ. 

Тэртээ 1960 онд алдарт шатарчин Л.Мягмарсүрэн 4 дүгээр ширээнд, 1964 онд домогт шатарчин Т.Үйтүмэн 2 дугаар ширээнд эрэгтэй ангилалд түрүүлж байсан түүхтэй билээ.