Уурхайчдын спортын их наадмын аваргын цомыг Эрдэнэт үйлдвэр үүрд хадгалахаар боллоо

Админ
2022/11/22

Монгол Улсад Уул уурхайн салбар үүсэж хөгжсөний түүхт 100 жилийн ойн хүрээнд эрдэнэсийн өлгий нутагт дөрвөн өдрийн турш үргэлжилсэн “Уурхайчдын спортын их наадам-2022” тэмцээний аваргаар Эрдэнэт үйлдвэрийн баг тамирчид шалгарч, үүрд хадгалах цомын эзэн боллоо. 

Уул уурхай, хүнд үйлдвэрийн яам, “Оюу толгой”, “Эрдэнэс  Тавантолгой” компани, “Эрдэнэт үйлдвэр” ТӨҮГ хамтран зохион байгуулсан тус наадамд уул уурхайн салбарын 30 гаруй компанийн 1500 орчим тамирчид оролцож, сагс, волейбол, ширээний теннис, дартс, шатар гэсэн таван төрлөөр өрсөлдсөн юм. Спортын наадмын аваргаар тодорсон Эрдэнэт үйлдвэрийн баг тамирчид, шатар болон ширээний теннис төрөлд алт, хүрэл медаль тус тус ихэрлүүлж, эмэгтэйчүүд волейболоор мөнгө, эрэгтэйчүүд алтан медаль, сагсны төрөлд эмэгтэйчүүд хүрэл, эрэгтэйчүүд мөнгөн медаль хүртсэн амжилтаараа ийнхүү “Үүрд хадгалах цом”-ын эзэд боллоо.

 Уурхайчдын спортын их наадмын шилдгүүдийн шагналыг Уул уурхай, хүнд үйлдвэрийн яамны сайд Ж.Ганбаатар, Уул уурхайн салбар үүсэж хөгжсөний 100 жилийн ойг зохион байгуулах ажлын хэсгийн дарга, "Эрдэнэс Монгол" ХХК-ийн Зэс, металлын группын дарга Х.Бадамсүрэн, “Эрдэнэт үйлдвэр” ТӨҮГ-ын Ерөнхий захирал Г.Ёндон болон зохион байгуулагч байгууллагуудын удирдлага, төлөөлөл гардуулав.

Уурхайчдадаа урам зориг, хүч нэмсэн спортын их наадмын өдрүүд "Улс орны хөгжлийн түлхүүр нь уул уурхай бол уурхайн хөдөлгөгч хүч нь эрүүл чийрэг, спортлог уурхайчид" гэдгийг харуулсан бахархалт үйл явдал боллоо.

Эх сурвалж: https://erdenettoday.mn


Сэтгэгдэл (1)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
  • 64.119.30.39
    2022/11/22

    Mongolrostswetmet turiin child uildweriin gazar bag hamt olnooroo mash sain oroltsoj bagiin dungeer 71 onoogoor 2r bair ezelsen, Erdenet 72 onoogoor 1r bair ezelsen buh uurhaichiddaa bayar hurgey

    Хариулах