Нийтийн тээврийн автобус нийлүүлэх тендерт шалгарсан Yutong Bus Co,Ltd гэрээнд заасан хугацааны дагуу эхний ээлжийн автобуснуудыг нийлүүлж буй. Эхний 35 автобусыг Зорчигч тээврийн нэгтгэл ОНӨААТҮГ-т хуваарилж, иргэдэд үйлчилж эхэлсэн бол бусад автобуснууд энэ нэгдүгээр сард багтаан нийлүүлэгдэж дуусах аж. Өөрөөр хэлбэл энэ сардаа багтаад 500 автобусыг нийтийн тээврийн үйлчилгээнд явж эхлэх юм байна. Үүнтэй зэрэгцэн ирэх сарын нэгнээс нийтийн тээврийн үнэ  нэмэгдэнэ. Нийтийн тээврийн нэг удаагийн зорчилтыг 1000 төгрөг болгож, тухайн өдөртөө 4 удаа дамжин суух эрх олгоно. Нийтийн тээвэрт үнэ төлбөргүй зорчдог иргэдийн картыг дээр дурдсанаар цэнэглэж өгөх аж.