ЦХХХ-ны сайд Н.Учрал АНУ–д хийсэн айлчлалынхаа хүрээнд Элон Маскийн удирддаг “SpaceX” компанийн төвөөр зочилж, үйл ажиллагаатай танилцжээ. “SpaceX” компанийн дэд ерөнхийлөгч Том Очинеротой уулзсан уулзалтын үеэр Starlink-н Монгол дахь үйлчилгээг 2024 оны 2 дугаар сарын 26-ны өдөр Испани Улсын Барселона хотноо зохион байгуулагдах Дэлхийн үүрэн холбооны конгресс (MWC)–н үеэр албан ёсоор нээхээр тохиролцлоо.

"Старлинк" компани нь 12 000 нам орбитын хиймэл дагуул бүхий сүлжээ үүсгэн өндөр хурдны интернэтийн үйлчилгээ үзүүлэх зорилтыг тавин ажиллаж байгаа ба одоогийн байдлаар 5500 хиймэл дагуул ашиглан интернэт үйлчилгээ үзүүлж байна. Хойд ба Өмнөд Америк, Европ, Ази тив болон номхон далайн арлуудын 70 орчим улс энэхүү үйлчилгээг одоогоор ашиглаж эхлээд байна.

Тус төслийг Монгол улсад хэрэгжүүлснээр өргөн уудам газар нутагтай  манай улсын өнцөг булан бүрд интернэт хэрэглээ хангагдах хийгээд гамшгийн үед, онцгой байдлын үед мөн малчин тариаланчид, тээвэрчид, аялал жуулчлалын аж ахуй нэгжүүдийн үйл ажиллагаанд онц чухал ач холбогдолтой гэж үзэж буй.

Мөн Франц Улсын Таллес Алениа компанитай хамтарч хэрэгжүүлэхээр ажиллаж буй үндэсний хиймэл дагуулыг 2027 онд SpaceX компаниар хөөргөх гурвалсан хамтын ажиллагааны бэлтгэл ажлыг эхлүүлэхээр тогтов.