Алтны салбарын өсөлт хойшлогдлоо: ЗГ, УИХ хоёрын “чиглэл хүлээсэн” зөрчил алтан боломжийг алдууллаа
Монгол Улсын алтны салбарт бодит олборлолтыг нэмэгдүүлэх, үндсэн ордуудыг эдийн засгийн эргэлтэд оруулах гол механизм болох тусгай хамгаалалттай газруудад өөрчлөлт оруулах асуудал энэ хаврын чуулганд багтаж шийдэгдэж чадсангүй. Харамсалтай нь, эрх баригч талуудын хариуцлагагүй хандлагаас болж уг асуудал намар хүртэл хойшлогдож байна.
Энэ удаа Байгаль орчны сайд Б.Батбаатар уг асуудлыг Засгийн газрын хуралдаанд оруулах үүрэгтэй байсан ч “татгалзсан” байр суурь барьж, асуудлыг ЗГ-д өргөн барих ажлыг хойшлуулсан байна. Үүний улмаас Засгийн газар өнгөрсөн Баасан гарагийн хуралдаанаар тусгай хамгаалалттай газартай холбоотой шийдвэрийг баталж амжаагүй бөгөөд, үүнтэй холбоотой УИХ-д өргөн барихаар бэлтгэж байсан тогтоол ч зогсонги байдалд оржээ.
Харин одоо УИХ-д төсвийн тодотголтой хамт өргөн баригдсан алттай холбоотой тогтоол нь Засгийн газарт чиглэл өгөх л утгатай тул бодит олборлолтыг нэмэгдүүлэх эрх зүйн суурь болж чадахгүй гэдгийг эх сурвалжууд хэлж байна.
Товчхондоо:
• Засгийн газар: “УИХ-аас чиглэл ирэхгүй бол бид тусгай хамгаалалттай газрын асуудлыг хөндөх боломжгүй” гэж хойш суусаар,
• УИХ: “Засгийн газар өөрөө шийдэх ёстой асуудлаа бидэнд үүрүүлж байна” хэмээн ундууцсаар,
чухал асуудал “хариуцлагын вакуумд” орж, хаврын чуулганы хугацаа дуусах гэж байна.
Алтны төслүүд хойшлогдож, хөрөнгө оруулалт саарна
Энэхүү үйл явц нь:
• Алтны олборлолтыг нэмэгдүүлэх,
• Хөрөнгө оруулалт татах,
• Валютын орлого нэмэх стратегийн ач холбогдолтой хэд хэдэн төслийн хэрэгжилтийг намар хүртэл хойшлуулах нөхцөл бүрдүүлж буй нь харамсалтай.
Төсвийн алдагдлыг нөхөх нэг том эх үүсвэр болох алтны салбарын дэмжлэг ийнхүү улстөр, хариуцлагын зөрчилд дарагдан зогсонги байдалд орлоо.
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна