Үйлдвэржилтийн бодлогын байнгын хорооны өнөөдрийн хуралдаанаар УИХ-ын гишүүн Г.Тэмүүлэнгээс Шадар сайд С.Амарсайханд хандан тавьсан Газрын тос боловсруулах үйлдвэрийг дэмжих тухай хуулийн хэрэгжилт болон Дорноговь аймгийн Алтанширээ суманд баригдаж буй газрын тос боловсруулах үйлдвэрийн бүтээн байгуулалтын явцын талаарх асуултын хариуг сонсож байна.

Засгийн газрын зүгээс газрын тос боловсруулах үйлдвэрийн бүтээн байгуулалтыг 2025 он гэхэд бүрэн дуусгахаар төлөвлөжээ.

Одоогоор дамжуулах хоолойн төсөлд Засгийн газрын баталгаа гаргах асуудлыг танилцуулж шийдвэрлүүлсэн. Төслийн ерөнхий болон туслан гүйцэтгэгч компаниудын бараа ажил үйлчилгээг нэмэгдсэн өртгийн албан татвараас чөлөөлөх асуудлын хүрээнд Сангийн сайдын тушаалаар чөлөөлөх шийдвэр гаргаад байна. Учир нь тус үйлдвэрт дотоодоос нийлүүлэх бараа материал, техник тоног төхөөрөмж байхгүй, бетоноос бусад гол бүх материалыг гаднаас авч байгаа юм байгаа аж.

Үйлдвэрийн ажил эхэлснээр таван төрлийн бүтээгдэхүүн гаргахаар төлөвлөжээ. Ингэхдээ 60 хувь нь дизель бүтээгдэхүүн байна. Тодруулбал, эхний ээлжид АИ-92 шатахуун гаргахгүй зөвхөн АИ-95 шатахуун, онгоцны түлш, дизель, шингэрүүлсэн шатах хий гаргахаар төлөвлөжээ.  АИ-98 зах зээлийн нэг хүрэхгүй хувийг эзэлдэг мөртлөө үйлдвэрлэхэд ажиллагаа ихтэй байдаг учир ийм шийдэлд хүрсэн байна.