Засгийн газрын хуралдаанаас гарсан шийдвэрийн танилцуулж байна.

БШУ-ны сайд Л.Энх-Амгалан:

- Засгийн газраас их, дээд сургуулиудыг орон нутагт сургалт, эрдэм шинжилгээ, үйлдвэрлэлийн цогцолбор болгон хөгжүүлэх тогтоолыг албажуулан гаргалаа. Их, дээд сургуулиудыг орон нутагт хөгжүүлэх нь нийслэлд үүсээд байгаа түгжрэлийг бууруулахаас гадна хөдөө бүс нутгийн хөгжилд нөлөөлдөг. Өнөөдрийн байдлаар Монгол Улсад 88 их, дээд сургуульд 158 мянган оюутан суралцаж байгаагаас 143 мянга нь буюу 92 хувь нь Улаанбаатар хотод суралцаж байна. Өөрөөр хэлбэл нийт оюутны тавхан хувь нь хөдөө байгаа найман их, дээд сургууль суралцаж байна.

Эрдэнэт, Дархан-Уул, Өмнөговьд сургалт судалгаа үйлдвэрлэлийн цогцолбор болгож МУИС, ШУТИС, ХААИС -ийг байгуулах шийдвэр гарч байна.

 Ингэхдээ салбарыг биш төв сургуулиудыг байгуулна.  Сургуулиудыг байгуулахдаа шинээр барилга барихгүй. Тухайн аймгуудад байгаа барилга байгууламж, дотуур байр, хичээлийн байруудыг ашиглаж өргөтгөл хийх замаар сургалт судалгааны цогцолборыг байгуулна.

Өмнөговь аймагт нүүрс, химийн, Эрдэнэтэд төвийн бүсийн аж үйлдвэрийн төв байгуулна. Үүнийг түшиглэж, ШУТИС, МИУС-ийг байгуулах бол  Дархан, Сэлэнгэ  бол хөдөө аж ахуй гол бүс учир ХААИС  байгуулна.  Ингэснээр 10-15 мянган оюутан орон нутагт суралцах боломжтой болно. Багш нарт орон нутагт ажилласны нэмэгдэл бий болно.

Учир нь хөдөө орон нутагт ажиллах боловсон хүчин олддоггүй. Цалин урамшуулал нь ЕБС-д ажиллаж байгаа багш ажилчиддаас муу тул орон нутгийг зорьдоггүй. Тиймээс хөдөө орон нутагт ажиллах багш нарт Улаанбаатарт ажиллаж буй багш нартай ижилхэн цалин, мөн хөдөө орон нутгийн нэмэгдэл, түүнчлэн ипотекийн зээлд хамруулах, тодорхой хэмжээний бизнес эрхлэх боломжийг багцаар нь хангана.