Энэ жилийн Элсэлтийн шалгалтыг  зургадугаар сарын 25-28-ний өдрүүдэд улсын хэмжээнд зохион байгуулагдах гэж байна. 2026 оны Элсэлтийн шалгалтад нийт 49,014 шалгуулагч бүртгүүлсэн талаар албаныхан мэдээлсэн. Тодруулбал, бүртгүүлсэн нийт шалгуулагчдын 87 хувь нь энэ оны төгсөгчид бол 13 хувь нь өмнөх оны төгсөгчид байна. Хүйсийн хувьд шалгуулагчдын 55 хувийг эмэгтэй, 45 хувийг эрэгтэй суралцагчид эзэлж байгаа аж. Харин байршлаар нь авч үзвэл нийт бүртгүүлэгчдийн 53.2 хувь нь нийслэл Улаанбаатар хотоос, 46.8 хувь нь орон нутгаас бүртгүүлжээ. Энэ жилийн элсэлтийн шалгалтад оролцогчид Математик, Англи хэл, Нийгэм судлалын хичээлүүдийг хамгийн олноор сонгон шалгуулахаар бүртгүүлсэн байна.