Нийслэлд өчигдөр орсон борооны улмаас үүссэн нөхцөл байдал, авч хэрэгжүүлж байгаа арга хэмжээний талаар Нийслэлийн Засаг дарга бөгөөд Улаанбаатар хотын захирагч Д.Сумъяабазар өнөөдөр мэдээлэл өглөө. Түүний хийсэн мэдээллийг товчлон хүргэж байна.

Д.СУМЪЯАБАЗАР: 

- Улаанбаатар хотод үүсээд байгаа үерийн асуудал газар олголттой шууд холбоотой. 

- Үе үеийн Байгаль орчны сайд нар Зайсан, Яармаг орчимд түр отоглох гэсэн хуулийн томьёоллоор газар олгодог байсан. Харин хот нь Туул гол орчмоос хойш газар олгосон байна. Энэ бол төлөвлөлтийн алдаа болохоос хотын дарга Д.Сумъяабазар болон БОАЖ-ын сайд Б.Бат-Эрдэнэ хоёрын асуудал биш.

- Хотын удирдлагууд өнгөрсөн 30 жилийн алдааг хууль эрхзүйн талаас нь засаж залруулахаар ажиллаж байна. БОАЖЯ-тай холбоотой үл ойлголцох асуудал үүсэж байгаа. Тухайлбал Тэрэлж орчимд Байгаль орчны үе үеийн сайд нар газрын зөвшөөрөл олгож, төлөвлөлтөө дураараа хийсэн байна. Үүнийг эрхзүйн хүрээнд нь цэгцэлнэ. 

- Тэрэлжээс Байгаль орчны яам 9-10 төрлийн замын хураамж авдаг ч ямар нэгэн асуудал үүсэх үед манай оролцох асуудал биш гэсэн сэтгэлээр ханддаг. Хэрвээ газар, замын асуудлыг цэгцлэхгүй бол Улаанбаатар хотын нөхцөл хүндэрч, гамшигийн хэмжээнд хүрэх нөхцөл рүү оруулж байна.

- БОАЖЯ отоглох болон түр отоглох байр гэсэн нэрийдлээр Тэрэлж болон бусад газарт зөвшөөрөл олгож ирсэн. Гэтэл тэнд 2-10 давхар хүртэлх байр барьчихдаг. Богд хан уулын орчимд барьсан 30-40 давхар барилга түр отоглох байр мөн үү.  

- Хан-Уул дүүргийн нүхэн гарц орчимд Т.Бадамжунай газар олгосон байдаг. Хүргэн н.Анартай холбоотой төлөвлөлтийн асуудал бий. Төлөвлөлт, газар олголттой асуудлын цаана авлигал явдаг. Өмнөх 30 жилийн алдаагаа засахгүй бол хот даяараа хий эргэж байна. 

- Өнгөрсөн 2-3 сарын хугацаанд 400-500 газрын зөвшөөрөл цуцалсан. Эдгээр зөвшөөрлүүд шүүхэд хандана, ар өврийн хаалгаар гүйнэ. 

- Төлөвлөлтийн алдааг зөвшөөрөл өгсөн олгосон ААН, байгууллагатай нь хариуцлага тооцно.