Монгол Улсын Үндсэн хуульд оруулах нэмэлт, өөрчлөлтийн төслийн хоёрдугаар хэлэлцүүлгийг өнөөдөр УИХ-ын ээлжит бус чуулганы нэгдсэн хуралдаанаар хэлэлцэж эхэлсэн ч техникийн саатал гарсанаар чуулган завсарлахад хүрсэн. УИХ-ын дарга Г.Занданшатар “Санаатай хорлон сүйтгэх ажиллагаа гэж үзэхээс аргагүй байна. Техникийн хэлтсийн дарга ажилдаа анхаар” хэмээн бухимдалаа илэрхийлсэн. Энэ үеэр УИХ-ын гишүүн Д.Пүрэвдорж “Эрх баригчид ирцээ бүрдүүл. Та нарыг зунжин хүлээлээ. 10 цагт эхлэх ёстой чуулган чинь 12 цаг өнгөрч байхад эхэлж байна” гэхэд АН-ын зөвлөлийн дарга Д.Эрдэнэбат “Хорлон сүйтгэсэн хүнээ олоод хэлээрэй” хэмээгээд чуулганы танхимаас гарч оджээ. Зарим эх сурвалжийн мэдээлж байгаагаар УИХ-ын Тамгын газрын техникийн хэлтсийн дарга утсаа салгаад “алга” болжээ. Ийм учир гишүүд чуулганы хуралдааныг зориудаар гацаахаар оролдож байна гэж хардцгааж байна.